REBOLUSYON
Ni Ka Lao
Ang Kalibutan nagtuyok
Susama sa kasing.
Samtang nagatuyok
Kini nagadagan
Palibot sa Adlaw.
Usa ka adlaw ang langkobon
Sa usa ka tuyok sa kasing.
Usa ka tuig ang langkobon
Sa usa ka tuyok
Palibot sa Adlaw.
Mao kana ang kinaiya
Sa rebolusyon sa Kalibutan
Patuyok sa Adlaw.
Apan ang rebolusyon sa katawhan
Lahi ang kinaiya.
Wala kini nagtuyok sa usa ka tawo.
Dili matag-an kung kanus-a kini
Mahuman og tuyok.
Mas paspas ang pagdagan niini
Kung mas grabe ang pagdaug-daog
Ug pagpahimulos.
Mas paspas ang pagdagan niini
Kung mas daghan ang musalmot
Sa pakigbisog
Nga wad-on ang pagdaug-daog
Ug pagpahimulos.
Dili matag-an
Kung kanus-a makumpleto
Ang usa ka tuyok niini.
Apan ang katawhan
Nakasiguro
Nga ang rebolusyon niini
Adunay samputan.
Kana
Mao ang kadaugan.
